الاثنين، أبريل 20، 2009

ملحمة عمدة بلدنا ( العمل كامل )

ملحمة عمدة بلدنا الجزء الاول
جناب العمدة

من جد جد الجدود حدانا ف البلد عمدة
اديلو سنين
الكنية عمدة والسحنة اشكال والطبع بطال
كما السابقين
فرعون وقراقوش ابوخالد وخرباوي
وزفت الطين
سلسال نكد ع البلد حالف يخربها
دنيا ودين
البطن تقلب تجيب خايب وتتعدل
تجيب ناصحين
وام عمدة بلدنا ما تقلبش و مبتجبش
غيرالفاسدين
عاشرت منهم ثلاثة سيرتهم غم تملا
الدنبا والدواوين
واحد دماغه حجر عدو ا لناس
وضيعنا شمال ويمين
والثاني مكار ف حضن الكفر باع
الارض ويا الدين
وضد الناس ركب راسه عمل فيها
ابو التفانين
واللي عليه الرمق طلع مجرور
ومخه تخين
كبر بطون الغفر تحميه وساب
الزرعه والدكاكين
كانه كلب العدا يحرس ويتمأسد
علي المساكين
ومجلس الحكم عنده مبيلمش
غير الواطيين
الكفر محطوط ف كفة اصاد العمدة
والعشرين
لاجل النصيب وقع عمدتنا
والرجال قاعدين
مليون سلامة الندامة
يابو السلاطين




الجزء الثاني
سلامتك ياعمده
ولما كان عمدة بلدنا راجل كبير وبيتعب وبيسهر علي مصلحة البلد واهلها المتعبين النكدية وقع في مجلس العمدية والخبر لف البلد وكان لازم اروح ازور العمد زي كل الخل واواسيه واقول له سلامتك ياعمده

سلامتك ياعمده وسلامة مقامك
يغور اللي يحلم يكسر كلامك
وتسعد وتبقي وتركب وتعلي
ويطول ف عمرك لانك فطين

نموت وانت تحيا
ونفديك بروحنا
نجوع وانت تشبع وتفضل تخين

نموت غراقانين
نموت محروقين
ف داهيه مدام انت راجل حصين

ونذهب وتبقي
ونغرق وتعلي
مفيش حد غيرك يكيد السنين


وناكل بصارة
ونركب حماره
وعيش انت واهلك ياابو السلطين

دا وضعك طبيعي
وفقري بايدي
براحتك ياسيدي وانا اكح طين


وتامر وتنهي
ونسمع كلامك
كانك خليفة امير مؤمنين

تصرف امورنا
بيوتنا وعيالنا
ولالينا خيرة مااحنا صغيرين

حريمك تشرع
والاشناب تقرع
واحلي قانون بايد نسوين

وبدل وغير
قانونك يحير
هنبصم عشانك بكل الايدين

ولايوم هنزعل
ونرضي خصامك
فيش ظهر فينا من السابقين

وتقعد ف دارك
وتحكم عيالك
خفيرك يكسر دماغ التخين

ويقدر ياسيد
ياخدني ف حديد
بامر الخواجة و سجنك امين

ياشاطر ف كارك
معلم عيالك
تموت وانت ضامن ربطنا ف مين

جمالك) ياعمده
ملا كل حته وعند الفرنجه
وعند الاعادي مكانك ثمين

(نضيف )هوه مخك
يامغرقنا (عزك )
ومجلس (سرورك) رضا السامعين

ووزع مراكز
كتير اللي حاجز
راضيهم ياعمدة دي ناس محرجين



تفض البلاوي
عدو الرشاوي
تخلص شراوي بلاد ولا طين

وناس يبعتوك
تراضي اخوك
بكلمه ف ودنه دماغه تلين

وتقفل بيبانك
وغيطك وحانك
ف غار ه جرانك عيال عصيانين

واخوك علقوه
ودار خربوه
وانت اللي واخد رضا هم يازين

وللزول محاكمة
وبيته ف ازمة
حبيبي يشاطر ف غض الجبين

سلامتك ياعمده وسلامة جيرانك
يغور اللي يحلم يكسر كلامك
وتسعد وتبقي وتركب وتعلي
ويطول ف عمرك لانك فطين
الجزء الثالث من ملحمه عمده بلدنا


وريث العمده

عزا كبير ف البلد كل اللي فيه بهوات
وفيه مشايخ عرب لابسين عمم برباط
بيعزي واحد بعين واحده وفيه خواجات
لافيه دموع ع الخدود لكن زعاق وصوات
لا وليه قالت ياجملي , ولا سمعنا عياط
وناس تجرجر شيخ عليه عمه ومفيش عبايات
وشكله مش عايز يفرا علي اللي مات
بالعافية بالذوق راح تقرا ياشيخ شحات
وهلف ماسك عصاية بيلطم الستات
وناس بترمي سواد ع العشة والعمارات
القصد من غير اسف عمدة بلدنا مات

ف الدار مفيش شكل موته والوضع مش معقول
والنعش فاضي هتدفن ايه ياشيخ بهلول
قاللي ده وضع العمد باين عليك مخبول
العمده مات من زمان من غير ماحد يقول
والست ماسكه البلد الحول يجر الحول
ولما كبر الوريث واجب بقي تعلن
( العمده مات يابلد), شكل الولد مقبول

يعني الكلام اللي داير ف البلد مليان
ان السياده وقع ( والعمده كان عيان )
علشان كده الواد ابنه دايما مع الاعيان
وهوه مبيقعدش زي العاده في الديوان
ولسه هاشرح كلامي كام دقيقه كمان
الا وناس مخبرين جامدين كما الحيطان
بقوا يطلعوا م الارض والبيبان وم الجدران
وبينزلوا م السما هاجمين كما الطوفان
ماسكين ف ايدهم دفاتر وكام مرشد علي العنوان
و كل دفتر فيه التهمه واسم القاضي والسجان
*انت كتير الكلام ف الشارع وف الغيطان
*وبزعج الناس وساكتين لك بقالنا ىزمان
*ومعانا شكوي وتوقيع خمسميت عيان
*ف الصورة مرتك ملطمتشي مع النسوان
*وانت معيطش علي العمده با شيخ شعبان
*انتو اللي غير البلد فيكم زياده لسان
*والشعب برده غلط لما طلع له ودان

وفر مني خيالي بيرجع اللي فات
بر ده جنازة كبيره زي النهار ده مات
فرضو علينا البكا واللطم والاهات
واللي مليح في النواح ياخذ عشر درجات
ومشينا بالنعش فاضي مسافات علي مسافات
وكتير بياخدوا العزا شنبات بدون مقامات
وستة مليون صنم مبدورة ف الطرقات
صورة الكبير ف البيوت والجيب كما البطاقات
مكتوب عليك بالعصا تبكي علي اللي مات


واتسلم الحكم للمخلوف ف مجلس عام
من حق مين يعترض ؟كل الكبار اختام
العمده شكله صغير لكن صنايعي كلام
يضحك ويبكي ويوعظ بالانجيل وبالمصحف كانه امام
فيه ناس كتيره ياحسره عاشت علي الاوهام
واللي معاه ف المجالس بالقرش بقوا خدام
واللي عينيه ع الحقيقه مرغم يبيعها بكام
واللي رفض ينطوي له ,نكدي وابن حرام
يلعب به اصغر غفير ويلبسوله خطام



والشبصاحب مزاج وارث و ابو السلطين
ووارث المخ عن والده وشب فطين
يشهد له شيخ البلد والرجال قاعدين

ويفكر العمدة ف الشله اللي مش ساكتين
ايه يعني فيها عرايا ايه يعني فيه مساكين
ايه يعني ناس مشتهيه عايشين ومش عايشين
ايه يعني شبان تدور شغل مش لاقيين
بيبصوا دايما علي الاحوال ومش راضيين
ابويا قسم كده والارض ورد وطين


جمع شويه غناي وكبارصحابه كاس
ايه العمل ف البلد دي دبروني ياناس
انتو اللي عينكم ملانه وهتخدموا باخلاص
عايزين نعيش ف البلد ما فيناش لوجع الراس
بينهم كبير من سنين لكل عمده مداس
قاله بسيطه ياعمده ادعي للوالد
سابلك شويه ورق للحكم ف الكراس

البطن مفتاح ياعمده . املاها تعمي العين
وزع شويه دقيق ولحمه ع المساكين
تلقي البلد تدعيلك بالستر دنيا ودين

وكام وظيفه خفيفه سيبها للعاطلين
تلقي السهاري بتكتر ع القهوة والدكاكين
والصيت يلف البلد دا الشغل بالملايين
الناس تغني بكرمك واللي يراجع مين

وانت كبير ف الكلام قول( الجيران حلوين )
وافتح عليهم طريق قيمة كده شهرين
وبعدهااقفل ياسيدي اللي يحوشك مين
نحرج عيال المساجد اللي مش نايمين
بالليل بيدعوا عليك وبالنهار سارحين
بيلسنوا ف الجوامع دايما ومش قاعدين

شيخ الغفر والحكيم وعامل التموين
وخضير بتاع الزراعه وكام شوال فاضيين
نقول عليهم ديابه ونقول عيال واطيين
سرقوا فلوس الناس لعبوا شمال ويمين
لمن يغوروا ف داهيه الناس دماغها يلين
ويقولوا مااحلي ولد و شديد علي الظالمين

العمدة زي الجدع قام نفذ المطلوب
نفسه يكون بالاونطة ف البلد محبوب
دور دماغ الناس والوضع بقي مقلوب
الكدب زي القمر والحق بقي محجوب
قالوا ده عمده عسل هوه ده المطلوب
خلي الي قبلك يغور كان ثايل مكلوب
بالدم نفديك ياعمده ياللي مفكش عيوب

بس اللي حب البلد فاهم الملعوب
يندب ياحسرة علينا دا الضنا مكتوب
راحت كرامة البلد ف الدنيا مش محسوب
م الفرد والقرد ياحسره بقي مغلوب
الناس بتاكل سلف والجيب فضل مخروب
والدين يزيد ع البلد والقفا مضروب
والشعب من غير جنايه م الغفر مركوب


http://shabanashor.blogspot.com/
















هناك 4 تعليقات:

شاعر سبيل يقول...

روعة يا عم شعبان
ايه الحلاوة دي

israa aboelghit يقول...

http://www.facebook.com/group.php?gid=20602338478&ref=mf

ندعوكم للتضامن معنا في مساندة اخواننا المعتقلين من الفيوم
هذا رابط الجروب عالفيس بوك (المعتقلين من ابناء الفيوم)
وان تضعو الرابط في مدوانتكم

..................
رابطة مدوني الفيوم

لواء الاسلام يقول...

كلام جميل يا حاج شعبان


مع اني مش فاهم بعض حاجات منه

جزاكم الله خيرا

محمد الشيمى يقول...

روعه..روعه..روعه..
اشتقت الى رؤيتك كثيرا يا استاذى الحبيب
نسأل الله ان تكون والاسرة الكرية بخير وباحسن حال
بلغ اخوانك منى السلام