سلام ياامي

سلام ياامي علي حالك وولدانك يشيل عن عينك الاحزان
سلام يجلي ظلام الليل عن المسجد عن العشة عن الغيطان
انا واقف علي بابك ابوس ايدك تقابليني خصيمك النبي العدنان
غلبت يامي ارضيكي وسال دمعي علي خدي كما الوديان
خدي روحي خدي عمري خدي قلبي وانا الكسبان
داانا نفسي اهنيكي وتبقي للبلاد سلطان
واطير ياامي ف سماكي واجبلك م القمر فدان
وارجع اسمك الغالي واشوف نورك وعز زمان
واخلي الصحرا مكسيه زهور وردي تغطيكي كما الفستان
انا واقف علي بابك وباسال ليه وبزعقها في كل مكان

ياامي ليه جفاكي الخير وفين نورك اديلو زمان
وليه زرعك كما ضرعك صبح دبلان
وشريان الحياه فيكي صبح تعبان
وخدعوا الارض جابت اكل بالسرطان
ويرضع منك الخنزير وطيرك م الضنا لهفان
وكبدي جاع وولدي ف الشتا عريان
مسبش فيكي فتفوته تقويني ,ولا ضله ولا قله تبل الريق وتروي طفلك العطشان
وليه ياام قصرك تسنكه الغربان
وليه ياام طين الارض خلوه للسجون حيطان
وضلعك ليه ياام صار بعد الحنان قضبان
وليه جبتي اخويا من الحشا سجان
وشال ظلمي علي صدره ياامي نشان
ودمي صار واوصالي علي راس الكلاب تيجان
وقدمتيني ياامي علي صنيه لاولاد الخنا قربان
ركبتي سفينه مش ليكي وخليتي اليه ربان
وادينا ف توه وف موجه بلا شطئان



تعبت ياام رسيني دنا حيران
وصدقتي ان انا كرهنتك وانا ولهان



باعيش غربه وانا واياك
وانا براك جوايا واناجواك اعيش براك
ف حضنك اشتهي دفاكي وانا ف ضلك اكون حران
واقلقل نفسي من طينك وجدري فيك واروح لبعيد............
واجيك مغلوب
واجيك تايه
واجيك غرقان
تعزيني وتبكيني وصيواني متين فدان
وانا ف حياتي كان يغنيني كام قصبه من الفدان
وناس كسره علي كسره يعزوكي ف ولدك اللي مات فطسان
وولدك اللي مات جيعان
وولدك اللي كان قبره عماره تابوت من الخرسان
وولدك اللي مات محروق ف علبه حديد سنين تجري علي قضبان
وولدك اللي قال الحق بات مشنوق علي العيدان
وولدك اللي مات مكمود بايد ولدك ورا القضبان
وولدك اللي مات مردوم وكان صاحي بايد ( ديان )
وقتالي يعزيكي وبوس واحضان
نكرتي كل نعم الله عدا النسيان

وف الصيوان لسان وودان :
يادي الاحراج طلع عريان
دا كان فسدان
وواد بطال وواد خرفان
وواد مش راضي بنصيبه مشي طفشان
من الاحكام
بلا فلقة دا كان هربان
وف الاخر وانا ميت طلعت ياام انا الغلطان
صحيح ياام انا غلطان ؟